新聞類別
財經
詳情#
【明報專訊】電盈每次搞股東會，好多長情股東風兩不改咁撐場，噚日冒住大雨出席股東會嘅黃伯亦唔例外。
之不過開完會之後，佢喺灣仔電訊大廈門口簷篷下一面避雨，一面接受傳媒訪問，點知無情嘅保安居然以「安全」為由將黃伯同記者「請走」，更加有保安「黑影」上身阻擋採訪，搞到伯伯淋住雨咁行開，主席李澤楷努力想建立嘅親民形象，一剎喇時間破壞晒。
粵曲音韻唱出電盈悲歌
70多歲嘅黃伯係電盈小股民代表之一，他最為所知嘅就係當年係私有化股東會外悲憤地以粵曲音韻，唱出盡訴電盈股價啲悲歌。黃伯今次亦唔例外，以粵曲音韻唱出電盈股價由（計及合股）140元到得返幾蚊嘅不滿。雖然主席李澤楷多次盛讚方案，但黃伯都依然有戒心，「一次不忠，百次不用……對於分拆，我真係好擔心，唔知會唔會咁搞一搞，搞到一無所有。」黃伯又投訴，係股東大會舉過好幾次手亦無發問機會，都不禁要質疑大會有做騷之嫌。
老股東：睇李澤楷點變魔術
電盈下午公布今次方案以九成九嘅股數（以出席股東計）贊成大比數通過。有一位86歲伯伯嘅股東雖然有出席上午的大會，但佢無投票，佢好有先見之明咁話，因為心底裏都知道反對唔到，「我唔支持（分拆），決定唔投票，佢（李澤楷）係到變魔術，我就睇吓佢點變魔術囉。」持有50萬股嘅伯伯以前靠電盈的股息過活，持有電盈幾十年，伯伯話家吓輸咗幾多錢，都唔想計喇。
email:piano@mingpao.com
回應 (0)
