陳榮聲入友邦 因有2厘按揭

【明報專訊】雖然全球金融業正值爆發裁員潮，但亦有同業不惜落足重本培訓同埋挽留人才，就好似友邦香港及澳門咁，除咗計劃每年投資1億元喺佢哋新推出既「AIA Premier Academy」培訓計劃之外，亦一直有為員工提供低息按揭計劃，就連佢哋嘅CEO陳榮聲都話，當年決定加入友邦，部分原因都係畀呢項福利所吸引。

陳榮聲噚日出席上述培訓計劃開幕典禮，見到一班幹勁十足既「八十後」保險業新秀，好自然回想番當年自己入行做新人嘅點滴。佢同小琴透露，自己1988年加入友邦任職精算Trainee（實習生），可以話由低做起。

80年代按息高達13厘

陳榮聲仲笑言當年加入友邦嘅其中一個原因，係因為80年代香港銀行既按揭利率高達13厘，而員工只要喺友邦做滿1年，就可以享受公司提供約2厘嘅低息貸款，認真和味。

不過，由於目前本港實際按息只有2.5至3厘，眼見低息貸款計劃對員工未必再具吸引力，友邦就喺今年8月推出咗員工認購股份計劃，條件係員工要任職滿3年，公司就會按照員工嘅購股數量，每2股送1股。