新聞類別
財經
詳情#
【明報專訊】近排個市有幾差就唔使講，雖然話呢兩日彈返成千點，但小琴唔少老友都已經輸到驚，唔敢再入市，新股上市同批股呢啲要抽水嘅活動自然無運行，好多新股刁都搞到要腰斬。既然集資就上唔到市，近排唔少公司就索性改為介紹上市，好似最近新濠（0200）分拆新濠博亞就改用介紹形式，實行上咗市先算，不過見到隻隻大刁都變晒介紹形式上市無佣收，一班banker就大嘆見財化水咯！
新股近排有幾唔掂，睇吓前日掛牌隻中信證券（6030）就知，呢家大大隻新股都只係得670名散戶認購，認購率0.44%創咗近年大型新股新低，最後雖然成功上市，但前日掛牌要自己友做承銷商死頂守住招股價，到咗噚日都係失守，跌咗差唔多7%，咁你話仲邊有人敢買新股呢。
工夫差唔多 收入差一截
個市搞成咁，唔少唔係咁等錢使嘅公司都放棄集資，改用介紹形式上市，好似下半年幾隻新股哈薩克銅業（0847）、建滔（0148）分拆依利安達（1151）咁，小琴聽講原本都係希望用發行新股集資形式上市，但因為個市唔掂就全部改做介紹上市，而呢個趨勢仲有蔓延迹象，就連太古（0019）分拆太古地產，同啱啱前日過咗上市聆訊嘅新濠博亞，都齊齊轉plan諗住介紹上市。
公司唔等錢使，點上市都無乜所謂，大不了等個市好返再批股，但有投行老友就嘆晒氣咁同小琴講，banker做刁收入來源一向都係睇你賣幾多股票去抽佣，但公司用乜嘢形式上市，banker要做嘅工夫就其實差不多，家隻隻大刁都話介紹上市，咪即係同佢講，喂，你又白做啦。
email:piano@mingpao.com
回應 (0)
