大新領匯宣傳新卡

【明報專訊】大新銀行（2356）同領匯商場合推嘅新信用卡大新領匯Happy Visa卡，唔知係咪因為打正「衣食住行」嘅主題啱用家口味得滯，連宣傳道具，好似人咁高嘅牙刷，都喺商場之中畀人順手牽羊，搞到大新信用卡業務主管Winnie歐陽少美喊晒咁口。

巨形牙刷 照樣失蹤

大新原安排喺上周搞記招宣傳新卡，但因為掛8號波取消，宣傳道具繼續留喺商場，可能因為太趣緻，搞到好多都不翼而飛，Winnie話臨急臨忙先趕工完成新一批道具，睇嚟要好好睇實喎。

講番張新卡先，小琴覺得最大賣點就係，儲現金回贈嘅門檻低到去25元，每25元現金回贈1毫子，如果係大新嘅開心商戶，就有3倍現金回贈，可惜嘅係張卡未有pay wave功能，吓吓都要簽卡，咁細數目就唔多方便了，大新執行董事藍章華話，呢張卡嘅目標發行量係幾萬張，家喺九龍區6個領匯商場先行推出，嚟緊會擴展到全部領匯商場都有呢個優惠。