中華網母企申破產保護

【明報專訊】昔日風光無限，但家幾乎被人遺忘嘅科網股中華網（8006），母公司中華網投資（CDC）星期二響美國亞特蘭大申請破產保護，停牌前CDC美國股價跌咗五成以上。CDC解釋話，因為佢哋同加州一間對冲基金Evolution Capital Management LLC嘅訴訟敗訴，要賠5億港幣，但佢哋已經準備提出上訴，申請破產保護只係為咗騰出時間籌錢，仲強調唔會影響到旗下子公司嘅正常運作。

睇到呢個消息，小琴難免唏噓，事關中華網響當年確實係威係勢，佢哋1999年美國上市，係第一家喺納斯達克上市嘅中國互聯網公司，2000年3月，中華網將旗下香港網分拆上市，集資13億左右，風頭可謂一時無兩，當時股價最高曾去到270元，但家呢？昨日股價2.5元，得番1%唔夠。

無甚搞作 資金放銀行收息

但亦唔知算唔算好彩，中華網響科網熱尾聲先上市，集完資都未趕得切大搞作，個泡沫就爆咗，所以間公司一直冇咩好搞，拎住10幾億放響銀行收息，「hea」吓「hea」吓又10年。

2005年，香港網改名中華網科技公司，母公司中華網就改名叫CDC，可能大家已經唔多記得，其實港鐵（0066）主席錢果豐係呢兩間公司嘅非執董兼主席。

不過，今次CDC申請破產保護，小琴最關心唔係呢間公司嘅生死，而係中華網個網址www.china.com命運如何。過去佢哋除咗註冊咗呢個咁靚嘅網址外，仲有www.hongkong.com同www.taiwan.com，可謂代表性十足，可惜www.hongkong.com已經響4年前成為歷史，白白浪費咗個好網址。

email:piano@mingpao.com