打贏New Balance 特步贊助渣馬

【明報專訊】內地體育用品股經過一輪腥風血雨嘅洗倉潮後，都想搵番啲喜事冲喜吓，早排已經宣布成為西甲球隊維拉利爾贊助商嘅特步（1368），噚日就宣布成為渣打馬拉松2012嘅服裝合作伙伴，為參賽健兒提供比賽服裝，除咗係第一個內地品牌成為渣打馬拉松服裝合作伙伴，仲打低咗已經連續9年任服裝贊助商嘅New Balance添。

不能睇小內地品牌

特步成為為渣打馬拉松2012嘅服裝合作伙伴，將會喺明年2月為來自全球各地達7萬名健兒提供比賽服裝，今次係渣打馬拉松16年以來，首次引入內地運動品牌做服裝合作伙伴，而對上一個贊助商New Balance，之前已經連續9年贊助呢個賽事。所以話，今次特步都幾威水，作為內地運動品牌，打低外國傳統運動品牌，喺國際舞台亮相，以後都真係唔好睇小內地品牌啦。