股民悲歌 笑中有淚

【明報專訊】呢兩個月嘅股市，真係可以用「吾不欲觀之」來形容，睇住從兩萬點到萬九、萬八，噚日仲要跌穿萬七點！小琴真係唔敢諗，我哋呢啲弱質纖纖嘅小股民，見到個市咁慘可以有咩表情！

同我哋一樣慘情嘅仲有祖國同胞，佢哋A股嗰邊亦都不斷尋底，由個幾月前嘅2700點去到上星期2400點關口都失守埋。不過呢，除咗嗚呼哀哉之外，祖國同胞都仲識得苦中作樂，發揮創意將股市嘅哀鴻遍野，改寫成一訣訣股民悲歌，小琴睇過真係字字血淚，笑中帶苦，好似下面呢首，小股民實有共鳴。

「買了浦發，白了頭髮；買了太保，三餐不保；買了人壽，愈來愈瘦；買了平安，徹夜難安；買了工商，全身是傷；買了基金，天天抽筋；買了石油，鍋裏沒油；買了石化，直接火化」

話時話，家股市咁低迷，唔知會有幾多人意興闌珊。上星期有個內地老股民就發微博宣布「股市再見」，仲埋單計數，從1993年開始入市，到今時今日，蝕咗120萬。唔知佢呢段微博，會唔會觸發大家嘅唏噓？又或者好似其他股民嘅留言咁，「同是股市淪落人，相逢何必曾相識。」