新聞類別
財經
詳情#
【明報專訊】最近溫州呢個城市真係全國甚至是全球關注，當地接二連三有企業老闆因為還唔起貴利而走佬甚至自殺，唔單止反映內地企業嘅經營困境，更重要係再任由民間借貸情况惡化，會有更多企業資金鏈斷裂，導致銀行壞帳急增的話，隨時嚟個「中國式次按」危機都唔出奇，到時淡友又可大做文章。
就響大家奇怪點解中央仲唔出手嘅時候，噚日就有人響網上流傳話，溫總已經去咗溫州視察情况，按常理睇呢，即係好快中央就會對民間借貸問題有指示。但小琴嘅溫州朋友講，其實上星期四就已經傳話溫總或者副總理級數的中央領導人物會去當地了解情况，但幾日過去，都唔覺有咩大人物到訪。
之不過咁，網上有片影到溫總噚日出現響浙江省另一城市紹興，所以亦有可能佢係先去紹興走一圈，再去溫州都唔奇，始終依家嗰邊人心惶惶，溫總去安撫民心都好應該。
溫州資本未見撤港危機
另外呢，前兩日有消息話有間叫溫州民間資本投資服務中心嘅公司，響香港調動2億資金返去協助其他困難企業重組，搞到有報道話溫州資本要撤離香港。
呢間公司嘅董事長黃偉健就同小琴解釋，調動香港嘅錢其實有兩個原因，一來溫州生意佬家草本皆兵，貿貿然叫佢地畀錢幫手一定唔制，而香港嗰邊原本已經集合咗來自海外華僑同其他省市共4億資本，立即拎2億唔難，亦有「全球華人扶持溫州企業」嘅鼓舞意義，畀溫州生意佬作借鏡之用。
但班華僑肯唔肯先？黃偉健就話佢地都會挑選運作正常，業務健康，只係老闆一時周轉唔嚟嘅企業，當係項目投資。黃偉健仲強調，香港嘅生意先至啱啱開始，點可能撤資，大家唔使驚咁話。
email:piano@mingpao.com
回應 (0)
