美元走強 H&M想人仔結算

【明報專訊】瑞典時裝零售商H&M一向人氣爆燈，喺香港嘅分店仲愈開愈多，不過今年H&M第三財政季度業績就出現下滑，原因竟然係美元走強，令供貨成本上升。噚日有報道就話，H&M正諗緊用人仔代替美元做結算貨款，以解決美元兌歐元嘅匯率波動。

《華爾街日報》報道，由於H&M同多數服裝供貨商都係用美元結算，不過銷售時就多數用歐元結算，所以美元兌歐元嘅匯率波動，係公司面臨嘅最大貿易風險。所以公司就考慮緊同主要供貨商直接用人仔結算。

H&M投資者關係事務負責人Nils Vinge就話，家公司仲用緊美元結算，因為美元仲係全球性貨幣，但係隨着中國經濟增長，同埋人仔走向國際化，公司就正在研究直接使用人仔結算嘅可能性，不過暫時就未有時間表嘅。