便服日 恒生高層齊聲Aloha

【明報專訊】唔少大型機構都會喺噚日響應公益金嘅「公益便服日」，畀員工着便服返工做善事，恒生銀行（0011）都唔例外，行政總裁梁高美懿聯同多名管理層一齊著夏威夷衫，大講Aloha，以夏威夷方式打招呼問好，充滿夏日氣氛。不過小琴就覺得，家都踏入10月份秋風起，仲着夏威夷衫會唔會凍咗啲呢？

除咗梁高之外，恒生總經理馮孝忠，以及曾於夏威夷留學嘅零售銀行及財富管理業務主管陳力生都着住夏威夷衫， 仲話Aloha Friday係夏威夷傳統，等上班一族喺周五着上夏威夷裝，用輕鬆心情上班喎。

至於恒生嘅好姊妹匯豐銀行，當然都有響應「公益便服日」，匯豐員工嘅衣著就好似聯合國咁，仲拎住各國國旗，夠晒異國風情。而恒生同匯豐年年都會響應呢個慈善活動，舊年各自都籌到120萬元。