新聞類別
財經
詳情#
【明報專訊】一講到家族企業，小琴嘅腦入邊就凈係歐洲古堡沒落貴族，但其實香港嘅家族企業成長都幾勇猛，連一向專注為歐洲巨富服務嘅瑞信，噚日都公布咗首期《亞洲家族企業報告》，轉身招攬新興市場客戶。
其實，唔計就唔知，原來香港上市公司總數入邊，62%竟然都係家族企業，不過包埋咁多隻國企大象後，班家族企業喺上市公司總市值嘅比重就凈得26%（見圖），排10個調查地區中倒數第二。
今次嘅調查包括全亞洲3568個市值超過5000萬美元嘅家族企業，其中有約四成，市值更加有5億美元以上，呢啲先至係真正豪門天下，而香港有294間入圍超富一族。但家族企業嘅定義就並非小琴之前想得咁，瑞信話無論直接或間接，只要家族成員持有公司20%以上嘅股份，就可以算係。呢個標準其實來自學術界，之前佢哋做歐洲調查時，用嘅係10%喎。
超人兩公司入圍 最威
地產霸權？呢啲仲係入門水平喇，瑞信話如果你睇下已經傳承到第4第5代嘅歐洲，就會知香港家族企業嘅勢力一定會蔓延到社會各方面。家入圍亞洲前20名嘅香港五大家族企業中，乍一眼好似都係地產商，其實差唔多已經變身綜合型公司，人人都幫襯過佢哋嘅服務。不過，香港家族企業家就面臨緊交棒嘅決定時刻。以瑞信嘅經驗，歐洲有唔少一交棒即沒落嘅先例，香港班大老緊緊揸住實權唔放，應該係仲未想出妥善傳遞創業精神嘅錦囊妙計。
email: piano@mingpao.com
回應 (0)
