外電一句話 思捷飈12％

【明報專訊】思捷環球（0330）由從前嘅零售股王「落難」後，股價愈跌愈殘，周一大跌市時仲跌到去7.6元左右，真係唔講都唔知思捷仲係藍籌。不過，噚日思捷無啦啦反彈12％，回到9.55元，原來外電報道話，世上無任何一家服裝零售商，比思捷更能提出一個有巨大折讓嘅出售價，惹起思捷被收購嘅憧憬，令股價大反彈。

彭博﹕估值廉宜易被收購

彭博報道講到，思捷市值曾達200億美元，但喺過去4年已經跌咗九成以上，好大原因係H&M、 Zara等服裝零售商搶客，令到思捷品牌失去靈魂。彭博指出，思捷市值僅109億元，只及佢1年營業額嘅32％，比任何服裝公司都要平。公司就唔評論有關報道。

不過，證券界就唔多睇好思捷被收購，有分析員就話，思捷經營不善，品牌形象老化，就算被收購，都好難有起色，事實上，雖然思捷股價噚日反彈，不過今年股價仍然累跌七成以上，市值唔見咗成300億元。