「廉署尅星」林炳昌 轉撈米業

【明報專訊】「廉署尅星」林炳昌早排同細價股無縫綠色（8150）炒大鑊之後畀公司董事局炒魷魚，不過以佢咁大名氣就唔愁無嘢撈，噚日香港老牌上市公司金源米業（0677）出咗通告，委任林大狀做獨立非執行董事，之前一直想幫上市公司搞好企業管治嘅林大狀，今次終於可以大展權腳啦。

林大狀早排同無縫綠色炒到火紅火綠，但勢孤力弱嘅林大狀最終畀人踢出董事局，林大狀喺對無縫綠色仲做緊全面收購嗰陣已灰灰哋，仲同小琴講打定輸數，會另覓一主好人家發展，小琴嗰陣探佢口風，但佢就死都唔肯講，到全面收購因為作價太低衰埋之後，先知原來呢主好人家就係金源米業。

金源米業主要代理金象米、澳洲袋鼠絲苗米呢啲名牌米，由祖籍潮州嘅林拔中喺五十幾年前創辦，去到08年林拔中大仔林烱燦過身，就交由細佬林烱偉同嫡孫林世豪打理，不過市場傳聞嚟緊林世豪將會全盤接手呢盤家族生意，話唔定呢名第三代將會大刀闊斧改革，到時林大狀唔知有冇機會大展拳腳呢！