新聞類別
財經
詳情#
【明報專訊】相信唔少人都聽過譚木匠（0837）呢間賣木製梳賣到上市嘅大陸民企，佢哋老闆譚傳華三兄弟全部都係傑出商家，畀大陸傳媒譽為「一門三傑」，不過，原來早排頻頻減持譚木匠股票嘅細佬譚操，早年嘅生意伙伴周奇金曾經涉及喺大陸好轟動嘅文強貪污案，細佬認真要帶眼識人。
譚氏兄弟雖然係重慶人，但原來譚操喺99年已經同Partner夾份，喺香港註冊咗間叫新龍香港嘅私人公司，間公司搞咩生意小琴就唔清楚，但係曾經做過福方（0885）董事嘅周奇金，唔單止同譚操喺西南政法大學畢業同校校友，譚操當年仲喺周奇金旗下嘅興安實業做過董事長，睇嚟佢兩個嘅Partner關係應該唔差。
不過呢位周奇金究竟同文強貪污案有乜關係呢？
合伙公司貪污案前已清盤
話說09年重慶市公安局原副局長文強突然被捕，原來呢位文強喺01至07年期間包娼庇賭，帳面總共收受咗1211萬人民幣賄款，就連有「重慶李嘉誠」之稱嘅富商張松橋旗下中渝置地（1224）都曾經畀佢敲詐過，而周奇金就係案發後兩個最大賄賂人之一，分別喺03年同04年兩次賄賂文強，總共使咗31萬美金（約241.8萬港元）。
呢個周奇金喺案發後人間蒸發，就連福方都話因為搵佢唔到炒佢魷魚，至於佢同譚操間公司，早喺佢行賄文強之前嘅01年3月已經清咗盤，當中發生咗咩事當然無人知。
沽貨減持套現300萬
不過，小琴發現譚操近排唔知係咪好等錢使，呢個月初大手沽咗接近100萬股譚木匠股份套現300萬港紙，公司方面話譚生一早知會咗，沽貨係有私人用途，嚟緊唔會再減持。睇返內地新聞，原來譚生喺內地有隊中甲足球隊，唔知筆錢係咪用嚟搞體育呢？
email: piano@mingpao.com
回應 (0)
