田土廳資料蝦碌

【明報專訊】小琴噚日得閒之際，查吓田土廳最新登記，竟然發現將軍澳私宅蔚藍灣畔一個755方呎嘅單位，成交價高達5.188億元、換言之，一呎賣成69萬元，貴過天匯10倍。唔通香港貴樓破咗人類歷史兼世界紀錄都冇人知？

小琴即時向田土廳查詢，獲知係提交文件嘅律師樓，錯誤將成交價打多咗兩個零，田土廳仲話，即時聯絡該律師樓，盡快修改咁話。

字面上暫成「全球最貴的單位」，位於蔚藍灣畔3座極高層E室，剛於9月4日簽臨約成交。田土廳昨回應本報查詢時表示，上述單位註冊成交價「確實」係5.188億元，就算翻查律師樓提交文件，發現無論係臨約或是正式合約，成交價一欄都打上5億呢個數額。

不過，呢個單位的交易印花稅只繳付了10多萬元，所以職員初步認為係律師樓職員將成交價打多咗兩個零，即係話，真實成交價好可能係518.8萬，換句話講，足足報大咗100倍。

小琴知道政府部門及大型代理，都會運算田土廳最新成交價，計算樓價指數，若能盡快糾正，將可免將軍澳樓價指數，無端端突然急升。