孫柏文疑醉酒出鏡

【明報專訊】有線財經節目近排都幾多風風雨雨，繼早排青姐胡孟青疑似被踢出局後，一向敢言嘅股評人肥仔孫柏文，前晚喺做有線節目直播嗰陣「疑似」飲醉酒胡言亂語，激到有線電視財經編輯主任顏寶剛紮紮跳，噚日仲發咗個內部memo聲言日後好難再同佢合作，今勻睇怕肥仔都聞到魷魚香咯。

有老友就send咗顏寶剛噚日個內部memo畀小琴，內容話肥仔原來唔單止喺前晚節目出街前最後一刻先現身，仲飲到滿身酒氣，「自問日後很難再同此君合作，否則對觀眾亦是不負責任，同時亦有需要向各位交代一下緣由，以免其他組日後不知原因而受拖累」。

小琴睇返前晚《華爾街速遞》節目，肥仔舉動的確好奇怪，不停講英文不特止，主持顧芷筠問佢覺得唔覺得歐債救市係漏氣水泡嗰陣，就開始胡言亂語，「如果係鍾意嗰個水泡……就一定要拿住個水泡」，唔知佢講乜。

小琴噚日打畀顏寶剛，佢就尷尷尬尬話唔方便講呢件事，不過就承認發過memo，但就唔肯講有線係咪從此炒肥仔魷魚；至於肥仔就一直唔聽電話。