新聞類別
財經
詳情#
【明報專訊】擁有恒盛地產（0845）同熔盛重工（1101）兩家上市公司嘅張志熔，雖然家喺財經界已經係知名人物，但份人一向低調嘅佢好少出席公眾場合，畀人感覺好似好神秘咁。不過，熔盛前日一份董事委任通告就揭開咗佢嘅面紗，原來唔聲唔聲嘅張總竟然係一位「孝順仔」嚟喎。
人工僅次於主席一人
話說熔盛前日出咗份執董兼副主席嘅委任通告，本來就好平常，不過呢位主角原來係張總老竇、張德璜張老先生，通告話今年已經65歲嘅張老先生，原來早喺2007年已經加入公司，仲喺企業管理同投資方面好有有經驗，喺內地仲有高級工程師牌照。
驚老竇無世藝搵嘢畀佢做就叫孝順？未算！張總出手闊綽，張老先生上任之後年薪高達240萬元人民幣，平均每個月人工係20萬元人民幣，職級同樣係執董兼副主席嘅鄔振國，就只係得唔夠74萬人仔，就算同其他高級管理層比，張老先生嘅人工一樣大獲全勝，喺董事局入面只係僅次於阿仔張志熔嘅883萬人仔（見附表）。喺內地國企，60歲已經係退休年齡，到65歲仲可以份咁吸引嘅人工，你話張總係咪唔話得，係咪「孝順仔」先？不過唔知熔盛嘅股東又點睇呢？
email: piano@mingpao.com
回應 (0)
