數碼通ifc請食蘋果批

【明報專訊】剛剛宣布同Vodafone分手嘅數碼通（0315），完全冇表現出失戀嘅沉淪，仲鬼咁多橋，趁蘋果教嚟香港設神壇，呀唔係，係蘋果嚟香港開旗艦店，數碼通都話要玩埋一份，就係喺ifc門市（即同蘋果旗艦店同一個場）請食蘋果批喎！食字兼玩噱頭，怕且又係數碼通行政總裁黎大鈞啲橋喇！

小琴噚日經過ifc，已經見到Apple Store 出面有人龍，可想而知啲粉絲幾咁期待朝聖。間舖今日先開張，數碼通就宣布，今日同聽日各位粉絲去完Apple Store以facebook check-in，再去到同樣位於ifc的數碼通門市check-in，數碼通就會請大家食蘋果批，總共3000個，希望吸引大家換完T恤，跟手去換埋蘋果批。

呢條橋吸唔吸到人流行多兩步過數碼通門市，小琴唔知，但小琴估都會益咗隔離間M字頭食肆，皆因數碼通門市側邊就係M記，雖則數碼通冇講明，但相信啲蘋果批都係由嗰間食肆提供，估唔到Apple Store開張個經濟效應可以咁闊！