賭王手持澳博股權 盡歸四太

【明報專訊】賭王何鴻燊旗下千億賭業王國嘅交棒路線圖愈來愈清晰，近排分批將自己嘅澳博（0880）股份逐批「送」畀四太梁安琪，啱啱今個星期三（21日）就將自己私人名下最後500萬股賣埋畀四太，實行一股不留，直頭錫四太錫到燶。

賭王自從喺上年年尾一次過送咗當時市值差不多48億港紙嘅澳博股份畀四太之後，分批將自己啲購股權換成股份，分批咁轉讓畀四太，睇返聯交所嘅股權資料披露，賭王的確好闊綽，除咗最近兩次分別用15.28元同17.72元，轉讓咗總共575萬股畀四太之外，其他4億幾股都無收過四太錢。計番四太兩次買股總共用咗8969萬，但佢手上批股份市值已經有成62.2億，乜都抵返晒，唔怪得早排見到四太幫東華三院籌款，笑得咁鬼開心啦！

四太變澳博單一最大股東

小琴睇返澳博家個股權架構，如果唔計股權分佈一直成疑嘅澳娛揸住嗰55.54%股份，四太已經係澳博單一最大股東，揸8.29％；不過，賭王佢老人家其實7月底已經轉讓咗3629萬股信德（0242） 股份畀二房長女何超瓊，即係話一人一間，都唔算偏心嘅！