李小加：人幣國際化如小Baby

【明報專訊】雖然個「孖屐」呢排跌到癲，但自從國務院副總理李克強上月訪港後，人民幣呢支歌仔始終縈繞住香港，港交所（0388）噚日同中國人民大學聯合搞咗個中國宏觀經濟論壇，主題仍然離不開講咗無數咁多次嘅人民幣國際化。

一出世 周圍就指指點點

港交所行政總裁李小加唔知係咪同小琴一樣，對呢個議題都有啲飽飽滯滯，佢噚日就話，內地正式開始人民幣國際化進程，其實只係1年多啲時間。但係各方面嘅專家已經不斷做文章，小加總裁自己睇到就覺得好「揼心」，原因係人民幣國際化就好似一個剛出世嘅小Baby，寶寶一出世，各路人馬已經不斷提醒父母有咩風險，又話BB好易患肺炎傷寒等等，又要講定小寶寶將來要讀邊間大學、做咩職業咁，實在係叫父母同小寶寶都太沉重。

小加總裁又話，目前人民幣交易頻繁，主要係因為大家對人民幣有升值預期，當中含有投機炒作成分，但呢個亦都係人民幣國際化嘅必經階段。而香港人一向多做事、少講理論，喺呢個大環境底下，香港最緊要快啲發展多啲人民幣產品，供投資者選擇兼搞活離岸人民幣市場，例如等啲人民幣投入股市，再由發行商將啲錢透過實體經濟回流內地，咁就達至雙贏嘞。

「最緊要發展多啲人幣產品」

小加總裁果然係賓架出身，講到最尾，原來都係sell人民幣股票產品，即係港交所密鑼緊鼓搞緊果瓣，犀利！

email: piano@mingpao.com