三一重工梁穩根 穩做中國首富

【明報專訊】新鮮熱辣百富榜，胡潤噚日終於公布咗2011年完整榜單，三一重工董事長梁穩根穩坐中國首富之位，身家700億元人民幣。前任首富娃哈哈掌門人宗慶後退居榜眼，以680億稍稍落後。百度創始人李彥宏亦都榮列新晉探花，財富達560億。龍湖地產嘅吳亞軍，第一次殺入十強，排名第七。

中國經濟好唔好，睇吓班富豪嘅荷包重咗幾多就知。今次全國百億富豪有127位，較舊年多咗三成，更加係前一年嘅一倍多。前1000個富翁嘅人均財富有59億，增長20%。相應來講，上榜門檻當然都提高，唔夠20億就唔好喇喇聲話自己係富豪，一年之間拉高咗5億。

有人風光都有人黯淡，代表醫藥行業嘅李鋰家族唔單止退出前三名，仲勁跌35位，資產縮水190億。而2009年首富比亞迪王傳福，較舊年再落32位，排第44。