比亞迪走樣 瑞銀要解畫

【明報專訊】噚日港股重災，已經黑氣纏身嘅比亞迪（1211）亦不能倖免「再下一成」，跌10.8%，得番12個半，距離股神當年買入嘅8蚊價位又走近一步，更慘係佢地響A股嘅表現，6月回歸至今已經就快跌穿招股價，仲連累到做佢哋A股保薦人嘅瑞銀證券要向中證監交報告解畫。

事關根據內地《保薦業務管理辦法》第72條，新股上市一年內嘅督導期間，如果嗰年純利按年下滑50%以上，中證監有權響3個月至1年內唔受理間保薦券行嘅其他推薦，情况嚴重嘅話仲可能會撤銷券行嘅保薦人資格。而比亞迪上個月公布嘅中期業績，純利點止下滑50%，直頭倒退近九成，瑞銀做佢保薦人，衰啲講真係唔查你可以查邊個？

業績太差 或撤銷保薦人資格

瑞銀就話，已經按照中證監要求交報告解釋呢件事。而有消息人士就講，暫時中證監未會查瑞銀住，因為家只係半年業績，但如果比亞迪全年業績冇好轉，就唔擔保唔查唔罰瑞銀了。

但講真，市場對呢隻巴菲特愛股真係冇咩期望，3個月前發行價18蚊人仔，升過一陣就插水，噚日A股價得番19個9，呢排個市咁唔明朗，真係破發在望。

比亞迪A股 升得一陣就係咁跌

大市拖累，比亞迪自己亦唔爭氣，交出一份失望嘅中期業績之後，又畀汽車銷售部門員工鬧佢變相裁員，然後央視插佢架熱銷車F3原來安全氣囊有問題，就連電池業務都畀人話埋一份，深圳就有居民抗議佢間電池廠污染環境，排放異味氣體，事件已經驚動到深圳市環保局