北京怕市民誤解

【明報專訊】小琴有個行家朋友曾經講過，最怕係搵內地城市自己公布嘅樓價統計數據，因為唔知準唔準。佢仲舉咗個例，去年6月北京市統計局公布二手樓成交均價為每平方米14,997蚊人民幣，按月跌2577蚊，搞到市民譁然，話同實際情况完全係兩回事。

亦都因為咁，市統計局之後暫停公布二手樓價統計，噚日仲好明確咁話，已經決定以後都唔會再公布二手樓價。市統計局發言人解釋，一來國家又冇話明確要求一定要北京公布二手樓價指數，二來，二手樓價格統計要靠地產代理提供數據，但係地產代理公司參差不齊，統計部門暫時都做唔到對二手樓市場嘅全面調查，與其公布唔齊全嘅統計會遭市民誤解，不如不報。