數碼通神氣 撇甩Vodafone

【明報專訊】數碼通（0315）噚日宣布，品牌將會係今年12月由「Smartone-Vodafone」轉為「Smartone」，即係數碼通將會同Vodafone結束7年嘅長跑關係，管理層同小琴講，公司呢幾年已經係全世界最先進嘅營運商之一，有啲服務甚至超越對方，合作嘅效益已經唔多。

Vodafone轉投3香港？

數碼通係新聞稿話分手原因係「方向唔同」，小琴立即打去畀數碼通執董陳啟龍了解內情，佢講「其實大家都記得，我地叫數記，加上我地都算係全世界最先進之一嘅營運商，有啲服務連Vodafone都提供唔到。既然係咁，（同Vodafone合作）成本高過效益，所以就唔合作。」

陳啟龍話其實合作初期，Vodafone都幫到佢地，例如可以優惠價啲採購手機Blackberry，但家下自己都做到，有投資者都有問過管理層，仲有沒必要合作。陳啟龍講，基於雙方嘅保密條款，唔講得雙方簽約費用有幾多，「但分開都可以話係慳唔少」。

另一方面，和電香港（0215）被問到會唔會同Vodafone合作時，發聲明話「公司與伙伴的合作計劃，會於適當時候向外公布」，唔通Vodafone會轉投3香港嘅懷抱？