牛根生一股不留蒙牛之謎！

【明報專訊】蒙牛（2319）創辦人牛根生唔做牛奶搞慈善，已經係人所共知，但佢同蒙牛之間究竟係「緣份已盡」定係「欲斷難斷」始終令人猜想。小琴就發現，港交所權益披露網頁顯示，牛根生喺9月9日已經將佢手上剩返嘅9900萬股蒙牛股份全部賣晒，係咪意味佢同一手養大嘅蒙牛已經各行各路呢？事關佢已經喺今年6月辭任蒙牛主席，家又冇晒股份，難免惹人疑惑。

之不過，上個月底蒙牛派成績表，首席執行官盧建軍曾經信誓旦旦咁話，牛根生只係離開管理崗位，並冇離開公司，仲解釋喺蒙牛上市之初，牛根生已經將手上股份捐晒畀佢一手促成嘅慈善機構「老牛基金會」，佢自己早就已經冇揸蒙牛股份好耐。

或是一致行動人士沽貨

咁又奇怪，既然冇揸好耐，又點會突然走出9000幾萬股來拋售呢？原來牛根生同多位一致行動人士，透過員工基金共同持有蒙牛股份，當中唔少都係當初同牛根生一齊打天下嘅蒙牛老臣子，其中只要有一個行動人減持公司股份，港交所嘅資料都會顯示係牛根生減持，好似7月份港交所就披露佢減持228萬股，結果搞到「老牛基金會」要出面澄清唔關牛根生事。

雖然今次都好大機會只係其他人套現，但咁大手筆將近億股賣晒，又會唔會係呢班老臣子已萌去意？似乎呢個牛根生盡沽蒙牛事件，都仲有好多「謎」有待解開。

email: piano@mingpao.com