龍湖與內地官媒「互告」

【明報專訊】小琴收到風，剛剛成為女首富嘅吳亞軍旗下龍湖地產可能惹上官非。內地《民主與法制時報》月初報道話龍湖（0960）喺北京通州嘅大方居保障房項目涉嫌存在質量問題，而本港一份報紙喺12號亦報道相關新聞，仲搵龍湖發言人回應，話間內地報館想用篇文要脅落廣告，被龍湖拒絕。

但係《民主與法制時報》昨日發聲明，話龍湖作出既回應係惡意誹謗，已經透過律師蒐集更多證據，隨時提出控告，佢哋仲話，原本同龍湖約好昨日見面，嘗試雙方處理好件事，但對方卻爽約。

小琴同事走去問龍湖，龍湖發言人就話對方報道刊登後已經發律師信逐一駁斥對方。資料顯示，《民主與法制時報》1985年創刊，主辦單位係中國法學會；而中國法學會為黨領導團體，會長韓杼濱更加係最高人民檢察院前檢察長。