恒大偉論 解構內部賣樓

【明報專訊】恒大（3333）員工豪花10億買自家樓，市場一時猜測紛紛，憂慮員工福利有無咁豪，憂慮公司賣唔出樓嘅亦都有，總之，家陣恒大股價跌到得番3個半嘅，就睇得出大家係幾咁憂慮啦。

引用馬斯洛需求層次論

講真，無一間地產商會喺大好市道之下將啲樓七折咁大手筆內部認購，恒大講3年一次，恰好3年前都係海嘯期間。公司幾個管理層好大方咁承認自己今次有認購，好着數。行政總裁夏海鈞就將買樓嘅問題拉高到國計民生嘅層次。佢話：「中國最大嘅問題係住房問題。對於好多中低收入階層人士來講，人生最大嘅需求係買房。」然之後，佢又引用馬斯洛（Maslow）嘅需求層次論（hierarchy of needs）來印證呢個觀點，再談到恒大要留人，唔單止靠高人工，都要提供埋廉價住宅。

至於咩係需求層次論，小琴才疏學淺，簡單將佢概括為衣食足然後知榮辱，有興趣了解更多之看官，不妨自行上維基解密研究吓。