奶奶斥「餓親我個孫」　婦崩潰

【蘋果日報】奶奶幫手湊孫，隨時觸發婆媳間大戰。精神科專科醫生林慧心（圖）表示，不少產後抑鬱個案由婆媳關係欠佳引起，建議夫婦事先溝通及協調，「好似講明要老公在場，奶奶先上嚟幫手湊孫」，以便作中間人調解分歧。丈夫亦宜主動分擔家務及育兒責任，減輕產婦壓力。
夫婦宜事先協定
林指，曾有女病人因產後與奶奶就育嬰問題存有分歧，包括沖涼方法、抱BB姿勢等，經常被指摘犯錯，感到很大壓力，向丈夫哭訴卻不獲支持，要忍氣吞聲。有次因為BB戒夜奶一事，遭奶奶指摘「餓親我個孫」，奶奶更私自抱走孫兒及餵奶，令女病人情緒崩潰及抑鬱，經常感到不開心及抱住BB喊。另外，曾有女病人因缺乏家人支援，丈夫在家只顧打機、睇電視，並遭「湊B有幾難？有幾辛苦？邊個叫你生，自己攞嚟」等冷言冷語對待，令女病人覺得無人愛錫、諒解，對單獨湊B感到徬徨無助，陷入抑鬱。
林建議若本身婆媳關係差，夫婦宜先商討處理方法，例如育嬰時有婆媳糾紛，丈夫要負責調解，不應坐視不理，例如先講明每周奶奶可探訪次數，或老公在場時奶奶才探訪等，有助減少衝突。產婦亦應多找朋友傾訴減壓，有需要時可找社工等專業人士協助。若支援不足，最好減少不太重要的家務職責，避免一個人做完所有家事。
■記者梁麗兒
想輕輕鬆鬆健康啲，記住留意健康蘋台
http://health.appledaily.com.hk/