夏蕙姨穿黑晚裝獻唱

【蘋果日報】藝人黃夏蕙、其契女艾美琦及歌手楊峰昨晚在銀城廣場擺檔，其間近百人圍觀，大部份為叔叔伯伯。夏蕙姨以黑色閃亮晚裝登場，「當登台咁做，做咗18年唔捨得，回憶初初唔係咁多人，娛己娛人唔係為搵錢」。問到噪音影響附近街坊，她說：「係呀，住樓上搞唔掂㗎。」
「最緊要唔好傷害到人哋」
問到殺街之後會否轉場，夏蕙姨笑言：「會去唱K囉！」問到日後會否「走鬼」到其他地方演出，她說：「唔可以，咁樣係犯法嘅，希望政府可以放寬做多啲街頭嘅表演啦，但係最緊要唔好影響到人就得喇。」艾美琦則指：「曾經喺條橋度同啲朋友一齊表演，但就被人趕。」楊峰提議可以效法日本，在商業區設一條街，這樣就不會影響居民，例如中環是理想地點。艾美琦贊同楊講法，並指外國人已把菜街當作旅遊景點，希望有一日可以做到。
提到菜街最難忘街檔，3人異口同聲指是他們自家檔，楊峰說：「我哋只收掌聲，不收打賞。」
夏蕙姨稱：「其實依家真係行都行唔郁，都冇人嚟買嘢，做嘢最緊要過得自己過得人，唔好傷害到人哋最緊要。」楊峰補充，「政府生咗個仔18年，依家18歲喇，開始百厭又唔理，希望會做得好啲」。
之後夏蕙姨與艾美琦合唱《禪院鐘聲》，不忘吩咐工作人員音樂不要太大聲，其間音響出現小問題跳線，但她繼續高歌，表現專業。
■記者盧坤穎