中環在線：東亞要夠「獨」

【蘋果日報】成日講，「毒男」梗有一個係左近，要出頭唯有「去毒」。曾俾對沖基金股東Elliott炮轟，獨董唔夠「獨」（獨立性），任期過長或有「交叉董事」安排嘅東亞銀行（023），就努力提升董事會「獨」嘅成份，唔夠「獨」就去「獨」，進一步提升企管水平。
東亞昨公佈一系列董事調動，包括長期任該行獨董嘅維他奶（345）主席羅友禮，同信置（083）主席黃志祥乖仔黃永光，明年起，雙雙由獨董變身東亞非執董。羅氏亦將終止出任審核委員會主席，不再擔任提名、薪酬及風險委員會委員，黃氏則終止審核及提名委員會委員。
羅友禮2000年已任該行獨董，而東亞執董兼副行政總裁李民橋，則出任信置系3間公司獨董。
今年5月，同樣有任期過長及「交叉董事」安排特質嘅電盈（008）主席李澤楷，同嘉里主席郭鶴年次子郭孔演已裸退東亞獨董。
李華華
LiWaWa@AppleDaily.com