網民鬧顏色肉酸　似回鄉卡

【蘋果日報】新智能身份證的大頭照較現時的身份證大，相片質素惹人關注。消息指，隨着科技進步，新身份證的大頭相片的解像度會較現時舊證高，但不會使用坊間流行的美化相片技術拍攝，「以免同真人有差別，影響辨別身份真偽」。
雖然不會使用美化相片技術拍攝，但消息指，入境處會利用先進的印刷技術美化相片，「令相片睇落美觀糅合啲」。
耗14.4億　市民轟嘥錢
不過，接受《蘋果》訪問的市民及網民對新智能身份證設計反應卻一般，大專生何小姐說，第一眼看到設計以為是回鄉卡，認為新證用色、相片擺放位置都非常相似，認為設計新不如舊，「舊嗰張靚啲，完全冇衝動想去換囉」。
不少網民更指新證色調與中國身份證類似，鬧爆新智能身份證用「大陸色」，十分肉酸，有網民憂慮連身份證設計也被赤化，「逐步逐步整到回鄉卡咁樣，喺度溫水煮蛙」，譏笑以後或會拎錯證過關。
不過，有受訪市民稱讚新證設計，陳婆婆讚賞新設計用色簡單，照片位置比以往大一點，「張相大啲好呀，我哋隻眼矇查查都睇到」，但認同設計與回鄉卡相似，「唉，回歸咗係咁㗎啦」。
另外，有受訪市民反對政府花14.4億元換證，任職出版社的李先生直指過往甚少聽聞有偽造身份證案件出現，質疑其必要性，「好嘥錢」，認為政府如有閒錢應該花在民生議題上。
■記者梁銘恩
市民劣評
安先生（室內設計師）：「唔鍾意個色，太紅啦，之前好少聽到有人成功偽造身份證，冇需要換。」
何小姐（大專生）：「個設計好似回鄉卡呀，舊嗰張靚啲，我鍾意多啲，完全冇衝動想去換證。」