中環在線：黃敏利錯撐舊同學賈躍亭？

【蘋果日報】舊年樂視創辦人兼CEO賈躍亭公司陷財困，作為舊同學嘅敏華（1999）主席黃敏利就同幾位內地投資者喺危急關頭出手注資樂視汽車，夠晒義氣。不過黃敏利噚日坦言，對目前樂視嘅情況「非常之唔理解」，亦好耐冇同賈同學接觸了。
噚日佢出席完敏華記者會後，俾一眾傳媒追問佢私人投資樂視嘅事，黃敏利講到，已經好耐冇聯絡賈躍亭，對於樂視最新消息都係睇新聞先知，佢話之前有人去過美國當地視察環境，但就老實講汽車業好難做。
樂視汽車面臨困境，黃敏利仲會唔會出手幫吓佢位好同窗呢？佢就話，家陣對樂視真係唔了解，加碼都要睇情況，至於筆錢拎唔拎得番，佢就回應一句：「投資梗係有贏有輸啦！」
李華華
LiWaWa@AppleDaily.com