友邦換舵手 「杜」規「黃」隨

【明報專訊】友邦（1299）上個月正式易帥，一手湊大公司嘅杜嘉祺過檔匯控（0005），將行政總裁一職交棒畀自己嘅老友，即係原本負責掌管中國同多個東南亞地區嘅區域總經理，馬來西亞華人黃經輝。雖然俗語有話「新官上任三把火」，但睇樣黃經輝就好似冇咁激進，佢仲話自己同杜嘉祺「好似」，無論喺做事方式定集團策略方面，未來友邦都唔會有好大轉變。


致力發展內地三線城市

黃經輝喺保險界打滾近30年，市場都預期熟悉經紀代理業務同中國市場嘅黃，未來會擺更多精力喺內地；公司噚日都宣布，話自己連續3年奪得保險業「百萬圓桌會」嘅會員人數第一名，舊年有8324個友邦代理成為會員，創歷史新高，其中有5326人，即係三分二都來自中、港市場。黃經輝就冇講明內地係咪會係自己嘅工作重心，但就話如果計「保障缺口」，成個市場價值高達51萬億美元，即係差唔多400萬億港紙，但家市場滲透率得10%，反映中國市場機遇多，家擴張就係同競爭對手搶優秀嘅員工。


email: piano@mingpao.com

[小琴密語]