港怡醫院體驗日 小朋友學通波仔

【明報專訊】今年3月啟用嘅港怡醫院呢兩日搞咗個小小醫生體驗日，逾百名小朋友可以喺真嘅醫院穿著手術袍扮醫生。唔好以為係打針餵藥咁「小兒科」，小朋友要幫手「通波仔」同照X光㗎。
活動夾埋有6個工作坊，涵蓋醫院入面唔同部門工作，包括急症室、X光室同手術室。小朋友除咗可以試吓模擬問診，仲可以用放大版心血管道具幫病人「通波仔」。
Emily都好想玩埋一份，可惜只係得4至9歲嘅小朋友可以參加。4歲嘅Jayden話畀Emily知佢最鍾意就係「通波仔」環節，仲擔心病人會痛，所以有好小心做。Jayden大個想做醫生，唔再淨係「通波仔」，而要幫人做手術。
報名近9000人 擬再辦
啱啱6月新上任嘅港怡醫院執行總監Dirk Schraven係荷蘭人，之前喺荷蘭同新加坡嘅醫院做過管理層。Schraven見今次報名人數有接近9000咁多，話會考慮再搞過，有興趣就留意吓喇。