「歌神」校友賀英華創校200年

【明報專訊】英華書院即將步入創校200周年，前日為咗慶祝英華小學新泳池建成，英華刷新健力士世界紀錄「Largest Gathering Of People Wearing Swim Caps」（最多人同時戴泳帽聚會），前財政司長曾俊華仲擔任見證人，而校友兼「歌神」許冠傑就叫人多多支持英華200周年嘅慶祝活動。


曾俊華見證「英華人」破健力士

2584名英華學生、家長、校友等「英華人」前日聚首英華小學，於10點齊齊戴上白色泳帽，挑戰2012年喺美國喬治亞州嘅紀錄，當時參與活動嘅人有2049個。除咗「薯片叔叔」曾俊華，立法會秘書長陳維安都有到現場見證。


英華多年嚟培育唔少人才，包括許冠傑，佢噚日仲拍咗條片，話自己喺海外演出而未能參與，希望大家支持接下來各項慶祝活動。除咗「歌神」，原來前財政司長梁錦松、與曾俊華同場選特首嘅退休法官胡國興都係英華書院校友。