周年晚宴未有風聲 廉署預計稍後復辦

【明報專訊】廉署舊年7月初發生執行處署任首長李寶蘭被取消署任及辭職風波，當時內部士氣之差，從七成已報名參加7月中周年晚宴嘅人員表明缺席可見，晚宴一度宣布延期押後，最終無舉辦。眨眼一年，近日傳出專員白韞六會獲續任消息，有心水清人員留意到廉署今年周年晚宴至今仍未有任何風聲，未知會唔會再舉辦。


李寶蘭事件後 上年無辦

Emily噚日問過廉署今年仲會唔會有晚宴一事，廉署指職員康樂會預計今年稍後舉辦周年晚宴，具體日期及細節訂出後將向同事公布。


Emily聽講，廉署周年晚宴係內部職員康樂會主辦嘅員工自費參與活動，過往都唔係只於7月舉行，試過喺9月或11月搞，晚宴期間有比賽，又會有管理層為員工比賽活動頒獎。


舊年晚宴喺舉行前一個月已賣晒飛，但因李寶蘭事件，大部分廉署人員通知管理層唔會出席晚宴，終無法舉行，內部形容係對白韞六表達不滿嘅舉措之一。如果白sir獲續任做廉政專員，Emily真係難以估計周年晚宴嘅售票反應會如何。