理大特製服裝 方便殘疾者自理

【明報專訊】由於行動不便，長者同殘疾人士著衫同選擇衣服都面對唔少困難，理工大學紡織及製衣學系轄下康健服裝中心就因應佢哋嘅各種需要，度身訂做特別服裝。30歲嘅李澔勤10年前遇上交通意外，膊頭以下癱瘓，換褲時特別麻煩，中心就為佢設計咗一款褲，褲管兩邊都以拉鏈連接，拉開後變回兩幅布，一前一後，穿著非常方便。


受惠者：設計可減好奇目光

澔勤雙腳亦有神經反射情况，平時坐輪椅出街，要用兩條粗帶固定腳部，職員設計褲子時就將本來外露嘅帶藏起。澔勤話呢種設計可減少其他人用好奇目光望佢，令佢更願意出去結識朋友，開拓社交圈子。


康健服裝中心總監吳秀芬話，本港為殘疾人士或長者提供功能性康健服裝嘅機構寥寥可數，中心以衣服為媒介，實踐關心社群嘅宗旨，「好多人無留意到，殘疾人士或長者著衫係十分困難嘅事。著一件衫要用上十幾二十分鐘，邊個都唔會開心。康健服裝可以修飾缺陷，解決問題，讓他們好似平常人一樣生活」。