支付寶新技術 嘟個樣畀錢

【明報專訊】以前睇電影成日會見到講啲惡人去買嘢食飯，篤一篤自己個鼻而唔俾錢，估唔到呢一幕就快成為現實。最近內地有一段關於支付寶最新技術嘅影片，顯示只要透過人臉識別技術，嘟一嘟你個樣就可以確認交易俾錢。咪以為係惡搞片，據內地傳媒引述支付寶回應，係確有此事，客戶不久將來就可以用喇。


有時都不得不感慨香港響電子支付技術方面嘅落後，當大家仲停留喺嘟八達通同碌卡找數嘅年代，內地講緊係一部手機已經可以代替現金，到家香港進步咗少少，叫做有多幾款電子錢包嘅時候，實在好抱歉，支付寶已經去到就算冇帶銀包冇帶手機都一樣可以俾錢嘅地步。


而且，大家唔駛諗住可以拎馬雲張相去嘟樣俾錢，事關呢部嘟樣機有活體檢測同人臉識別計算法等等防偽技術，一定要真人先嘟得到。不過小琴好奇，如果整咗容或果日唔夠瞓眼腫，會唔會嘟唔到呢？


email: piano@mingpao.com

[小琴密語]