理大時裝展 林大輝撐場撐到尾

【明報專訊】早前講明無意喺新一屆政府分餅仔嘅前議員林大輝，繼續專注做佢最鍾意嘅教育同體育事務。Emily星期三見到紡織業出身嘅佢，以理大校董會副主席身分出席母校嘅紡織及製衣學系針織時裝作品展，支持新一代嘅創意設計。


針織時裝作品展由理大畢業生、多家針織時裝製造商同紗線供應商聯合舉辦，22個同學各展出一系列4款針織作品。理大紡織及製衣學系系主任忻浩忠教授就話，今次時裝作品展除咗展示同學喺設計同製作上嘅努力同創意，亦顯示出一眾贊助商對學生嘅鼓勵。Emily留意到唔少業界人士都撐場撐到尾，林大輝之後率領學生同贊助商合照，唔知佢會唔會順便物色人才加入紡織業呢？