客串《廿年》廣播劇　富貴田少聲演露宿者

【明報專訊】香港回歸20周年在即，港台7月會推出題為《廿年》嘅廣播劇系列，一連10集講述回歸故事，噚日錄音。港台除咗請到胡楓同羅蘭等藝人做主角，更邀得民主黨創黨主席李柱銘（Martin）、工聯會榮譽會長陳婉嫻（嫻姐）同自由黨榮譽主席田北俊（田少）3名政壇元老客串，分別聲演中學校長、英文老師同露宿者。Martin同嫻姐更會喺同一集出現，唔知會擦出咩火花呢？
李柱銘演校長 陳婉嫻做老師
田少聲演嘅露宿者，係從東莞回流香港嘅「落難」港人，親人由於同佢失去聯絡，所以要尋親。本身家底豐厚嘅田少噚日就透露少少劇情，話自己成世人都未試過買麵包要講價咁話。至於人稱「媽打」嘅民政事務局前常秘李麗娟亦有客串，劇內聲演田少姐姐。
根據劇情設定，Martin角色「說話帶官腔，客氣而綿裏藏針」，至於嫻姐角色就「溫文爾雅」。本身係資深大律師嘅Martin形容今次聲演廣播劇「好爽」，笑言平時打官司講錯嘢要即刻講對唔住，但聲演廣播劇即使「蝦碌」都唔會有事，因為可以重錄。嫻姐就話今次聲演挑戰大，自己就睇咗兩次劇本，但都享受過程。