馬逢國倡增孔誕假 政府：未見廣泛訴求

【明報專訊】香港現時有唔少具宗教性質嘅公眾假期，體育、演藝、文化及出版界立法會議員馬逢國早前向政府提出建議，希望每年嘅公眾假期增訂「孔聖誕日」，同時刪減「復活節星期一」假期，以維持每年公眾假期總日數不變。勞福局長蕭偉強噚日透過書面回覆，話諮詢民政事務局後，認為有關建議至今未見有社會廣泛訴求，所以要小心處理。


倡減復活節星期一假期

馬逢國話，孔教推崇孔子學說同儒家思想，特首梁振英講過孔子係萬世師表，對中國歷史同社會影響深遠，孔子提出嘅「仁義禮智信」係中華民族核心價值，值得弘揚推廣，而自2014年起，政府已經將每年9月嘅第3個周日，訂為「香港孔聖誕日」。佢話相關公眾假期建議「據悉已獲得其餘五大宗教的領袖支持」。


蕭偉強強調，現有公眾假期安排係經過多年廣泛諮詢後訂定，任何修訂建議都會為社會各界帶嚟深遠影響，所以必須喺取得社會廣泛支持同明確共識後方能推行。至於政府有咩措施推廣儒家思想同價值觀，蕭偉強重申政府尊重信仰自由，並歡迎不同宗教團體喺所屬宗教節日舉行紀念同慶祝活動。