吳秋北批周浩鼎「愚不可及」

【明報專訊】立法會UGL調查委員會風波繼續發酵，事件被揭露係由於文件電腦版嘅「追蹤修訂」功能，顯示特首梁振英修改咗民建聯周浩鼎提交嘅文件。工聯會理事長吳秋北（圖）噚日喺facebook出帖文，不點名批評「周君」，指周「怠惰」「顢頇（糊塗）」，原封不動將修訂交去秘書處係「愚不可及」，令「反對派」可以「抓到小辮子（捉到把柄）」咁話。
吳秋北噚日同Emily講，自己係「就事論事」、「講道理」。佢喺帖文話，「梁先生」無非想教周君將事情來龍去脈、有關法律規定同相關懷疑查個清楚，從目前揭露嘅資料，「只能說明周君的無能，所提調查未能觸及關鍵要旨，才有梁先生的進一步細查的建議」。
稱周「顢頇」 反對派有機可乘
吳秋北形容，「反對派」明知佢哋對梁先生所收款項嘅指控難以成立，正當苦無計策之際，「顢頇周君便自動送上門了。這便可以讓反對派來個沒完沒了的審查，好戲連場矣！」
事件主角周浩鼎噚日喺立法會成為傳媒焦點，會議期間佢現身午膳，記者一路追住佢去到宴會廳門口，亦喺門口等佢用膳完畢再追問。面對幾十名記者包圍，周浩鼎只係話「無補充」，由於記者擋住去路，佢都要講聲「唔好意思，畀條路行吓」，有見立法會走廊狹窄，佢都叫記者小心睇腳，而黨友張國鈞最有義氣，全程企喺周浩鼎後面，護送佢返會議廳。