「楊過車長」現身 表演少林十八響

【明報專訊】Emily日前報道網上熱傳一張九巴車長瞓喺巴士站欄杆上嘅圖片，車長獲網民封為「現代楊過」、「古墓派傳人」。呢位仁兄噚日終於現身，原來佢係九巴退休車長成哥，不過佢就唔係古墓派，而係玩北少林嘅，成哥仲即時示範點樣瞓欄杆，同埋耍咗一套少林十八響(口添)。
係九巴退休車長
今次九巴公關好識宣傳，噚日喺facebook專頁上載訪問成哥嘅影片，睇到成哥一隻腳跨過欄杆，跟住打平身體瞓上欄杆，提起一邊腿，三爬兩撥「到位」，非常輕鬆。
成哥話，佢退休前係揸98D路線嘅車長，平時要抖嘅話，都會喺車長休息室，佢話嗰日係「出去玩吓」，先會喺欄杆上休息喎。而片中訪問成哥嘅後生仔亦好面善，佢就係當年放棄高薪厚職轉行揸巴士、目前負責路線策劃嘅9A會考狀元梁領彥。