慶回歸 鄉議局營造新界10萬旗海

【明報專訊】好多建制團體都會舉辦各式慶祝回歸活動，鄉議局噚日召開會議，主席劉業強宣布會舉辦「旗揚新界家國情」活動，喺新界鄉郊各處掛起國旗同區旗慶祝，仲預計到時會有10萬支國旗同區旗飄揚。唔知七一時係咪真係會出現紅旗四處飄揚嘅盛况呢？


劉業強喺執委會會議致辭時話，鄉議局已經訂購咗3萬支國旗同區旗，每個鄉事會至少獲派1000支旗喺各區鄉村懸掛，連同友好團體，預計整個新界區屆時會有10萬支國旗及區旗飄揚，令新界洋溢慶回歸嘅氣氛。此外，鄉議局亦會有其他慶回歸活動，好似6月26日會舉辦慶回歸典禮暨文藝晚會，話到時會有多名內地同本港知名歌手演唱。


今年民陣未能借用維園足球場做七一遊行起點，屆時球場有香港各界慶典委員會舉辦嘅創科展，劉業強噚日話鄉議局成員會以個人身分參與，佢相信參加者唔會同遊行人士發生衝突，又話香港係多元化社會，能容納不同意見。