UGL委員會會議 公開變閉門

【明報專訊】立法會調查特首梁振英UGL事件嘅專責委員會，過去幾次會議都出現建制派「拉布」嘅情况，搞到至今委員會連研究範圍都仍然未定好，民主黨林卓廷同尹兆堅噚日話，收到消息下星期一（15日）嘅會議，突然改為閉門舉行，批評建制派玩「花招」。


尹兆堅話，委員會係以呈請方法成立，關注梁振英有無守法及有無涉及利益衝突嘅問題，認為有必要畀全港市民知情，會議當然應該公開，質疑突然改為閉門會議，係咪意味建制派會有更多花招同不可告人嘅事要做。佢指建制派委員早前已就委員會嘅研究範圍，提出好多瑣屑無聊嘅行為。


林卓廷亦都話，委員會嘅研究範圍係由立法會秘書處草擬，經過立法會法律顧問研究，但連有法律背景嘅建制派委員都無接受，喺字眼上糾纏，批評建制派咁做只會影響委員會嘅工作進度，佢話已向委員會主席謝偉俊反映，表達不滿會議改為閉門嘅做法。