開瓶驗會失價值 廉署銷毁茅台唔拍賣

【明報專訊】前廉政專員湯顯明被揭發任內用公帑購買茅台等烈酒，用喺公務宴會上宴客，2013年時廉署全面禁止於公務場合飲用烈酒。廉署早前書面回覆議員就預算案提問時就話，湯顯明任內購買嘅烈酒已經全數銷毁，民主黨林卓廷早前就去信跟進，要求當局解釋點解選擇銷毁烈酒而唔係拍賣。
阿廷就話，近日獲廉署回覆解釋，廉署曾經向政府物流服務署諮詢拍賣事宜，得悉如果經該署拍賣，必須先證明呢啲烈酒係適合人體飲用嘅，而廉署其後亦分別向食環署及政府化驗所查詢，得知除非將呢啲酒開瓶，否則唔能夠證明呢啲酒適合飲用。
廉署又話，基於呢批烈酒數量唔多，而且來自唔同來源及批次，如果將酒開瓶檢驗，就會失去市場價值，考慮公眾健康、行政成本等因素，認為不宜拍賣，故喺廉署「部門物料處置委員會」監察下，將呢啲酒全數銷毁。
林卓廷批浪費 指收據可證購自代理
阿廷對廉署嘅回覆感到無奈，認為廉署可提供當日購買茅台等烈酒嘅收據，證明係經代理購買，認為將烈酒銷毁嘅做法，「又唔知道浪費咗政府幾多萬蚊」。