房署未批「畫住先」 鄭松泰議辦壁畫迅速還原

【明報專訊】熱血公民立法會議員鄭松泰月初喺青衣長亨邨開設議員辦事處，事前未獲房屋署批准下繪畫外牆壁畫，佢噚日喺facebook貼相，見到房署派員「還原」外牆，以油漆覆蓋畫作。佢同Emily講，話其實3月已經提交申請，但過咗成個月都未獲回覆，所以決定畫住先，直到完成畫作先獲告知申請被拒。


稱3月申請 逾月沒回覆

鄭松泰諷刺房署今次係「鮮有顯示工作效率」，因為房署處理申請要成個月，但其議辦開張個幾星期後，房署就已經迅速派人處理外牆。佢話自己噚日就事件同房署職員會面，引述職員話今次事件唔會影響議辦租約，但佢就要負責「還原」外牆費用，未知要幾多錢。


不影響租約 「還原費」自負

鄭松泰議辦嘅畫作，原本係米白色背景，上面畫有鄭松泰肖像同幾個人一齊跑步，有一幅香港地圖，並寫上「RUNNING FOR OUR COMMUNITY」字樣，房署還原時就用泥黃色油漆塗上去。鄭松泰話職員向佢重申，議辦擺放嘅招牌同告示板都要向房署申請，例如要提供大小尺寸同設計資料。