5．19開始 崇光外禁區延至午夜

【明報專訊】早前銅鑼灣崇光百貨公司門外嘅巴士站違泊問題嚴重，更觸發巴士司機工會發起按章工作，運輸署今年3月就事件諮詢地區，諮詢結果顯示，超過八成市民都支持延長禁區時間，所以運輸署亦宣布會喺5月19日起實施新措施，爭取咗有關建議好耐嘅灣仔區議員楊雪盈都話好歡迎新措施！

區會倡禁的士短暫上落客

灣仔區議會轄下嘅「發展、規劃及交通委員會」早前已舉行特別會議，建議延長崇光百貨外一段軒尼詩道「不准停車限制區」嘅時間，由目前朝7晚8，延長至午夜，又建議運輸署唔再容許的士短暫停車上落客。


運輸署近日發通告指出，諮詢期間收到557個意見，其中471個（即85%）意見支持延長禁區時間嘅建議，運輸署亦決定要盡快推展上述建議，會喺5月19日做所需工程，包括設置路面標記等。有份支持延長禁區時間嘅區議員楊雪盈就好歡迎新措施，仲話等咗咁耐，運輸署真係喺SOGO外劃禁區喇。