君悅6．28至7．1無房訂 領導人入住？ 職員﹕有可能

【明報專訊】香港回歸20周年在即，政界普遍預料會有國家領導人訪港，國家主席習近平到時或會為候任特首林鄭月娥監誓。國家領導人近年訪港，大多下榻灣仔君悅酒店，Emily噚日以顧客身分致電酒店查詢訂房情况，職員話6月28日至7月1日都無房供應，但前後嘅日子仍然有房。問到上述日子無房供應，係咪會有國家領導人入住呢？職員回應話﹕「有可能。」


職員稱「大慶回歸」故房間爆滿

酒店職員解釋，今年係「大慶回歸」，酒店鄰近會展，所以房間「book（預訂）晒」。Emily噚日喺酒店網頁嘗試「預訂」上述日子嘅房間，就顯示「酒店在您所申請的旅行日期內無法使用。酒店已滿額或尚未開放供人訂房」字句。


Emily又透過多個訂房網check吓上述日子酒店訂房情况，見到除咗君悅，港島或紅磡區嘅五星級酒店，大多數仲有房間供應。


翻查資料，全國人大委員長張德江舊年5月中訪港，住喺灣仔君悅酒店，酒店嗰段時間同樣無房供應。至於國家前主席胡錦濤2012年訪港，都係住灣仔君悅，佢喺當年7月1日朝早喺會展為特首梁振英監誓同發表講話，中午已經離港，無等埋下晝3點先舉行嘅民陣七一遊行。政界估計，今次領導人訪港，大概都會係7月1日主持完回歸慶典儀式就會離開。