陳美齡話唔會做教育局長

【明報專訊】各界關注下任教育局長誰屬，早前有報道指有史丹福大學教育博士學位嘅前歌手陳美齡（圖）係人選之一，唔少人睇到新聞都嚇一跳或者得啖笑。陳美齡噚日就接受商台節目訪問，繼續賣關子，被問會唔會做教育局長，佢就話「假設性問題唔會答」，畀外界留有空間討論，但經主持人追問後，陳美齡終於話自己唔會做教育局長喇。


非單獨見林鄭 稱對港「有感情」

陳美齡喺電台節目話，自己多次同候任特首林鄭月娥交流教育議題，但就唔係單獨見面嘅，而林太就問佢對香港係咪好有感情，佢回應話「梗係有感情啦」。對於被傳係教育局長人選之一，佢話當時回應記者話唔評論，令人覺得「可能係又可能唔係」，直言佢家姐都同佢講，答唔係「咪冇咩事囉」。


陳美齡其後被問到無行政經驗點管公務員，佢話「覺得自己唔會做教育局長」，咁顧問形式服務呢？佢就話自己係白紙一張，現時只係開始，但大家討論係非常好嘅事，不過強調唔係你想做咩就做咩，要人哋搵你先可以做，而自己若留港全職工作，日本嗰邊嘅工作會有困難，又話要視乎崗位係咪適合自己。